一花一世界（下）
上集：https://bit.ly/38Vk0gu
我望向「災難組」，只見有啲花被噴緊水，有啲花被強烈嘅光芒照射住，有啲花不斷抖動……
「做埋啲咁嘅實驗，你太過份啦。」阿達好嬲，想衝上去打葉博士。
我連忙拉住阿達，我都好嬲，但要解除我個世界嘅災難，仲要靠葉博士，唔可以得罪佢。
「可唔可以，將我個世界朵花移去……正常組？」我用最誠懇嘅語氣問。
葉博士就問：「邊朵花係你㗎呢？」
望住眼前無數嘅花、無數嘅世界，我一時語塞。
我講出我之前經歷嘅災難次序、情況，葉博士通過電腦記錄，終於搵到我朵花。
我即刻戴眼鏡觀察嗰朵花，只見荒蕪嘅土地上，野人用獸皮包住身體，喺山洞中生活。
我搖頭：「唔係呢個，我個世界雖然冇呢度咁高科技，但都有屋住、有文明、有政府。」
「你嚟呢個世界，嚟咗幾耐？」葉博士問。
我答：「一年幾啦。」
「人間一日，花中一年，你個世界已經過去咗幾百年啦。」葉博士打開一條片，係我個世界嘅記錄。
我見到平靜嘅生活，然後係無數災難、大祭師將我送出嚟，但水災繼續發生，全國都被淹沒，死傷無數，文明崩潰。
但有少數人活下來，為咗躲避水災，佢哋上咗山洞度住，以野獸甚至昆蟲為食，生活好艱難。
「你個世界嘅人真係堅強，咁都冇滅亡。」葉博士感慨。
我淚如雨下，大祭師將所有希望擺喺我身上，結果，我救唔到任何人。
所有我識嘅人都死晒，成個文明已經毀滅。
我望住艱難生存嘅野人，再問：「可唔可以將佢哋移番去正常組？」
「你都唔識佢哋，佢哋都係幾百年後嘅人啦。」葉博士答。
我強調：「但呢個始終係我嘅世界。」
「哦，你想拯救世界。」葉博士點點頭：「但實驗唔可以亂咁更改，除非……你入番你個世界。」
阿達將我護喺身後，好警惕咁問：「你係咩意思？」
「佢從花世界中出嚟，變成呢個世界嘅人，我好有興趣對佢進行研究，睇吓可唔可以擺番佢入花世界。」
葉博士愈講愈興奮：「如果得，咁就可以進行下一步嘅研究，研究花世界與現實之間嘅通道，為人類開拓無數個新世界。」
人間一日，花中一年，我返去花世界，分分鐘老死都冇機會返嚟呢度。
我唔捨得冷氣、美食、科技，仲有深愛我嘅阿達，而且花世界已經變得咁荒蕪，只有茹毛飲血嘅野人。
但係，我當日應承咗大祭師，要拯救世界。
呢個時候，阿達拉一拉我隻衫袖，將佢部手機遞畀我，畀我睇一個信息。
我一直都冇身份證，好多嘢都唔方便，阿達就到處拜託朋友，希望幫我辦身份證。
而呢個信息，就係佢朋友話佢知，呢件事已經十拿九穩。
我呆咗。
「有咗身份證，你可以堂堂正正咁做人，我哋可以結婚。」
阿達喺手機上打字：「我收到呢個消息，本來想等下星期你生日，畀個驚喜，但今日……我驚你走，我好自私。」
最大嘅困難都解決咗，我只要留低，我嘅未來會幸福快樂。
我望一望花世界嘅野人，我同自己講，嗰啲已經唔係我嘅同胞，我唔識佢哋，所以我都應該冇責任拯救……佢哋嘅世界。
最後，我離開葉博士嘅實驗室，冇再返過嚟。
午夜夢迴，我有時會諗起，我曾經同大祭師講，就算犧牲性命，我都會盡力。
我曾經背負住拯救世界嘅責任，但最後我冇盡到力。
因為，當日我願意承擔重任，我嘅動力係對親友嘅愛、對個世界嘅依戀、流連失所嘅無助。
但依加所有嘢都冇晒，親友死晒，個世界變晒，我亦有咗依靠，唯一剩低嘅，就係責任。
沉甸甸嘅責任，令我呢個凡人，臨陣退縮。
每個人都有責任，每個人都應該負責任。
但當所有美好嘅動力都冇晒，只剩低沉重嘅責任。
充滿弱點嘅凡人，難免會有退避嘅欲望。
－完－
將專頁設定為「搶先看」/ "See first"，最新故仔馬上睇！
我收到死鬼阿爸封信：https://goo.gl/AEADyn
複製人之城：http://bit.do/faTnU
#短故 #短篇 #小說 #陳美濤 #廣東話 #粵語 #tomatochan #一花一世界
Search